Bagimana Mendjadi Broentoeng Dalem Pernikahan

NOVEMBER
1931
Bagimana Mendjadi Broentoeng Dalem
Pernikahan.
Kongtjotjo Poenja Sepoeloe  Larangan.

Oleh ; 
Mej. Tjiong Djie Nio
Semarang.

1. Bila kaoe soeda mengindjek di mana
lapangan bernikah,   djangan   sekaji   kaoe   males  berdandan dan soengkan
berias, kaloe kaoe tida ingin boewang itoe sarinja kabroentoengan; tapi  kaoe
haroes   djaga   djoega   dengen   djoedjoer   itoe kabroentoengan  mendjadi
kekel.

2. Aken dapetin Itoe kabroentoengan,  kaoe   haroes djangan loepa
djaga kaoe poenja kwarasan badan, kerna kasehatan ada penting sekali berhoeboeng
dengen segala masaikan di dalem dapoer. Ambilah Ini tindakan jang tida  menelen 
ongkos besar, perhatiken semoeanja   hidangan  jang  kloear  dari   dapoer
boem-boenja merasa sedep dan enak; kaoe bisa lekas boektiken brapa besar kaoe 
poenja  soeami   nanti   hatoerken banjak trima kasi.

3. Apabila   kaoe  
taoe   soeamimoe   tinggal   dalem roemah  doedoek  mengasoh,  djangan  goenaken
itoe  tempo  bikin   dijengkelnja   ia poenja   pikiran, dengerken   segala  
tetek-bengek   jang   koerang   perloe atawa kaperloean roemah-tangga ini dan
itoe koerang; kasilah ia mengerti  perloe sekali  ambil tempo boeat bebrapa hari
doedoek  mengasoh,  atawa   pergi  tetira di mana kota jang  hawanja  dingin. 
Nanti  la  kombali lagi dengen badan sehat dan  penoeh kagoembirahan aken  
sampeken   apoenja   kwadjiban   berlipet   ganda.

4. Djangan  ambil 
perhatian   dari  iapoenja   familie atawa   sobat-andenja;   pertjajalah  
pada   dirinja seperti djoega kaoe pertjaja pada badanmoe sendiri boeat bikin  
iapoenja  kabaekan.   Nanti   ia   poedji  tinggi kaoe poenja kamoelia'an dan
tida gampang moesna dari iapoenja  pengrasa'an tjinta.

5. Djangan  
se'kali   kaoe   tjelah   dan   menjomel   bila soeamimoe   pake   dasi  
atawa   pakean   jang  kaoe rasa  koerang,  seneng,   atawa   kabetolan   sekali
ia isep cigaret bikin kaoe tida tahan dari mengeboelnja asep. Kaoe haroes pikir
iapoenja kasoeka'an dan  kainginan   sama   sadja   seperti   djoega   kaoe  
poenja   kamaoean dan kasenengan.

6. Djangan kaoe mendjadi poetoes
harepan hadepken soeamimoe di dalem oering-oeringan, biarpoen jang mendjadiken
pokoh dan soeal ada satoe prempoean jang paling tjantik; kerna itoe soeda
djamaknja orang prempoean koedoe intjerken kadoea matanja, apa dirinja lebih
manis dipandeng terhadep pada laennja. Djoestroe ini toeladan kaoe haroes tiroe
seperti djoega laikoenja itoe prempoean. Lebih agoeng kaoe oendjoeken kaoe
poenja katinggian hati, lebih toendoek ia nanti briken kahormatan.
Tapi !
Inget djangan kaoe berlakoe tjongkak, kerna dirimoe djoega ada satoe
prempoean.

7. Bila kaoe taoe soeamimoe poelang roemah membawa bingkisan,
sekalipoen itoe bingikisan terisih satoe barang bilkin kaoe merasa koerang
seneng, atawa beroepa satoe pakean bila kaoe pake matjemnja seperti orang oetan;
trimalah dengen penoeh kagoembirahan dengen kadoea tanganmoe srentah brikoet
djoega satoe tjioeman boeat iapoenja katjinta'an.

8. Bila  ada   sedikit
karewelan  jang   sering  kali  dateng hinggapin, djangan kaoe mendjadi ketjil
hati, goenakenlah kaoe poenja katadjeman mata boeat liat dari mana datengnja
itoe pokoh; kerna oemoemnja kariboetan bisa dibikin 'moesna oleh kadjinaka''an
di rnana masing-masing tida mengandoeng arti apa-apa hingga kombali sampe di
mana dasarnja kabroentoengan.

9. Djangan   soeka   roendingken   dan  
mendongeng segala  perkara  jang  soeda kadjadian  lama,  se­perti  djoega  
kaoe   ingin  sadjiken  hidangan jang soeda berbaoe bazin. Inget ! kerna sedikit
pertjidra'an ada salah satoe djembatan  jang menoedjoe  di  mana pintoe  Gerbang
Pertjerean.

10. Inget! itoe perkata'an bernikah jang kaoe berdoea
soeda terangkep mendjadi soeami dan istri ............ kaoe tjinta ia,
bri'kenlah kahormatan dan rawatlah ia saben hari di waktoe ia dalem kwarasan
atawa dalem sakit; loepaken segala kabintjana'an, pertjajaken kaoe poenja diri,
badan dan soekma tergantoeng pada dirinja. Bila sawaktoe-waktoe ia bikin
kasalahan, sedarken dan bikin ia mendoesin dari iapoenja piikiran jang tersesat,
kerna orang lelaiki bisa mendjadi penghianat dari Iantaran orang
prempoean.